МЫСОСТЫ ТЫХХÆЙ ЗАГЪТОЙ
…Ирон советон поэзийы Мысосты размæ уый хуызæн тыхджын ничи равдыста йæ уарзондзинад йæ адæммæ, йæ бæстæмæ, стæй йе
‘нæуынондзинад йæ адæмы æддагон æмæ химидæг знæгтæм. Йæ сатирикон уацмысты тых дæр арæзт у адæмы знæгты ныхмæ, – адæмыразмæцыд чидæриддæр æмæ цыдæриддæр хъыгдары, уый ныхмæ.
ГАДЖИТЫ Георги
…Мысосты поэзи дуджы тохы гимн у, Мысосты сфæлдыстад ног царды зарæг у.
…Æндонзæлланггæнаг бæрзонд патетикон пафос Хъамбердиаты Мысосты сфæлдыстад æввахс кæны В. Маяковскимæ, фæлæ уый мур аууон дæр нæ дары поэтыл. Мысосты сфæлдыстад арф уидæгтæй баст у национ культурæимæ. Йæ уацмысты аивадон амæлттæн сæ бындур кæддæриддæр ирон, националон у. Агурæг поэт у. Уый канд ног хъуыдытæ, ног æнкъарæнтæ не ‘рбахаста нæ поэзимæ. Уый архайдта ирон стихарæзты формæтæ ауæрæх кæныныл.
БЕСТАУТЫ Гиуæрги
Хъамбердиаты Мысосты поэзи мын зынаргъ уыди мæ сабийы бонтæй фæстæмæ. Йе ‘мдзæвгæтæй йын бирæтæ зыдтон æнæ чиныгмæ кæсгæйæ. Мах, рæзгæ фæлтæр, нæ хистæрты фæзмгæйæ, разæнгард уыдыстæм ног царды, уæлдайдæр та «рухс» фидæны идеалтæй, æууæндыдыстæм сыл, æмæ нын Мысосты поэзи сси тырысайау.
ХЪОДЗАТЫ Æхсар
…Формæ йæ мидисимæ диссаджы фидыд кæнынц Мысосты æппæт сфæлдыстады дæр. Кæрæдзиимæ вæййынц æнгом баст, æмæ, цас арфдæр вæййы поэтæн йæ хъуыды, уыйас аивдæр вæййы йæ формæ. Цас курдиатджындæр уа фыссæг, – йæ цæст вæййы уынагдæр. Хуымæтæджы адæймаг цы хъуыддæгты рæзты рацæудзæн, уыдоны рæзты никуы рацæудзæн курдиатджын фыссæг. Ахæм у Мысост, йе ‘рыгон цæстытæ сты уынаг. Уымæй, цы уыны, уый аив фæлгонцты.
Адæмон, националон æмæ интернационалон элементтæ йæ зæрдæйы бацахстой иухуызон бынат æмæ кæрæдзийæ фæиппæрд нæ комынц. Иухуызон зыд у ирон æмæ уырыссаг культурæйыл дæр.
ХÆДАРЦАТЫ Азæ
ХЪАМБЕРДИАТЫ МЫСОСТЫ ПРЕМИЙЫ ЛАУРЕАТТÆ
Хъамбердиаты Мысостæн Хуыцау цы цæрæнбон радта, уыцы карæй мах раджы фæхицæн стæм, фæлæ ма йе сфæлдыстады рухс цæхæртæ махæн фæзминаг сты абон дæр. Æцæг нывгæнæджы сыгъдæг зæрдæйы цы уацмыстæ равзæры, уыдон фæстагæттæн ныфсдæттæг вæййынц æдзухдæр. Ахæм у Мысосты поэзи.
ДУДАЙТЫ Чермен
Ирон литературӕйы Мысосты фӕзынд хурыскастӕй уӕлдай нӕ уыд. Хуры фӕлгонцӕй-иу йе сфӕлдыстады дӕр арӕх спайда кодта. Уый, ӕвӕццӕгӕн, уымӕн, ӕмӕ йӕ зӕрдиагӕй фӕндыди йӕ уарзон ирон адӕмы талынг цард барухс кӕнын. Ӕмӕ, кӕд ӕвзонг поэтыл йӕ хур раджы аныгуылди, уӕддӕр ма абон дӕр, ирон аив дзырд чи уарзы, уыдоны удтӕ тавынц Мысосты ӕгӕрон курдиатӕй гуырд уацмыстӕ.
ГАБОЛАТЫ Зауырбег
Арвæрттывдау акалдта цæхæртæ æмæ ацыд йе ‘цæг дунемæ. Кæд хæрзцыбыр рæстæг рацард, уæддæр ныууагъта йæхи æрмдзæф ирон литературæйы. Йе сфæлдыстадæй хъæздыг хæдзары дуæрттæ гомгæнæгау уæрæх æмæ ныфсы фæндæгтæ райтыгъта бирæ æрыгон литератортæн. Йæ зæлланггæнаг поэзи дзы скодта æнæмæлгæ!
КАСАТЫ Аслæнбег
Райхæлынæввонгæй цы дидинæг ратонай, уыйау рауад Хъамбердиаты Мысосты сфæлдыстадон хъысмæт дæр. Фæлæ, кæд бирæ нæ фæцард, уæддæр баззадис ирон литературæйы историйы. Йæ рæнхъытæ сты мидисæй арф, фæлгонцтæй та хъæздыг.
БЕТЕТЫ Фатимæ