Республикæйы Коцойты Арсены номыл уынджы национ зонадон библиотекæйы уыд конкурсы уæлахиздзаутæ æмæ архайджытимæ фембæлд. Цы уацмыстæ кастысты конкурсы, уыдонимæ базонгæ кодтой мадзалмæ æрбацæуджыты. Амыдта йæ журнал «Мах дуг»-ы сæйраг редактор Хетæгкаты Оксанæ. Уый раарфæ кодта конкурс-æркасты архайджытæн æмæ сын бафæдзæхста, цæмæй уæлæхох ма кæной сæ мадæлон æвзагыл.

Фæндырыл ирон цæгъдтытæ акодта Цæгат Ирыстоны сгуыхт артисткæ Зæнджиаты Ритæ.

Раныхас кодтой æмæ конкурсы уæлахиздзаутæн арфæ ракодтой Цæгат Ирыстоны дзыллон коммуникацийы комитеты сæрдар Фидараты Юри, газет «Северная Осетия»-йы сæйраг редактор Битарты Маринæ, Парламенты депутат Уататы Зелим, Цхинвалы 9-æм астæуккаг скъолайы ирон æвзаг æмæ литературæйы ахуыргæнæг Æлборты Оксанæ, газет «Рæстдзинад»-ы сæйраг редактор Хозиты Барис æмæ æндæртæ.

Уыдон уæлахиздзаутæн радтой Кады гæххæттытæ æмæ лæвæрттæ. Конкурс-æркаст «Базыртæ»-йы уæлахиздзаутæ систы: Дзæуджыхъæуы 27-æм астæуккаг скъолайы 9-æм къласы ахуырдзау Дзиуаты Агуындæ, Джызæлы 2-æм астæуккаг скъолайы 9-æм къласы ахуыргæнинаг Битарты Дианæ, Æрыдоны 2-æм скъолайы 8-æм къласы ахуырдзау Гикайты Зæлинæ, Алагиры 5-æм скъолайы ахуыргæнинаг Боциты Миланæ, Цхинвалы 9-æм скъолайы ахуырдзаутæ Гæбæраты Хох æмæ Владислав, Хуссар Ирыстоны Къостайыхъæуы (Цъунар) астæуккаг скъолайы 11-æм къласы ахуыргæнинаг Джиоты Миланæ, Цхинвалы районы Дменисы астæуккаг скъолайы 9-æм къласы ахуыргæнинаг Уалыты Аслан, Дзæуджыхъæуы 42-æм скъолайы 11-æм къласы ахуырдзау Тататы Маленæ, Хуссар Ирыстоны Къостайыхъæуы астæуккаг скъолайы ирон æвзаг æмæ литературæйы ахуыргæнæг Хетæгкаты Бэллæ, Дзæуджыхъæуы 38-æм скъолайы ирон æвзаг æмæ литературæйы ахуыргæнæг Дзæрæхохты Ритæ, Фарныхъæуы сывæллæтты рæвдауæндоны хъомылгæнæг Кучиты Фатимæ, Национ телеуынынад «Осетия-Ирыстон»-ы амонæг Шаулохты Лянæ, Дзæуджыхъæуы «Сабиты сфæлдыстадон центр»-ы уæлæмхасæн ахуырады педагог Пагæты Людмилæ, Каиры театралон студийы актеры дæсныйады ахуыргæнæг Гæздæнты Дзерассæ, фæсивæды хъуыддæгты фæдыл агентады пресс-службæйы кусæг Пелиты Сабинæ, Алагиры 10-æм рæвдауæндоны хъомылгæнæг Дзгойты Зæлинæ.

Конкурсы сæрмагонд дипломтæй хорзæхгонд æрцыдысты: Плиты-Икъаты Зоя (89-аздзыд), Борыхъуаты-Лианты Дыгорхан (88-аздзыд), Дзæуджыхъæуы 44-æм скъолайы 9-æм къласы ахуырдзаутæ Самирæ Хакимова, Абойты Батрадз, Хъыргъаты Дзабо, Хъыргъаты Дауыт-Сослан, Дзæуджыхъæуы 46-æм скъолайы 9-æм къласы ахуыргæнинаг Челæхсаты Альберт.

Фæсивæды ‘хсæн сæрмагонд дипломтæй хорзæхгонд æрцыдысты, ирон мыггæгтæ чи нæ хæссы, фæлæ ирон æвзагыл æнувыд чи у, уыцы ахуырдзаутæ — Алагиры 3-æм скъолайы 9-æм къласы ахуыргæнинаг Полина Щекина æмæ Ног Урухы астæуккаг скъолайы ахуыргæнинаг Давид Мунтян.

Хистæр кары архайджытæй сæрмагонд дипломтæ райстой Уримæгты Людмилæ (66-аздзыд), Мысыкаты Аслæнбег (райгуырд Ольгинскæйы, цæры æмæ кусы Мæскуыйы, у сабиты дохтыр), Беслæны 1-æм рæвдауæндоны хъомылгæнæг Дзестелты Заремæ.

 ГАССИТЫ Моисей, газет «Фидиуæг»