МÆ БÆЛЛИЦТЫ БÆРЗОНД АРВМÆ ТÆХЫН

          КУЫВД

О Сфæлдисæг, мæ Ирвæзынгæнæг!
Мæ Иры зæхх Дæ сау фыдæхæй бахиз.
Дæ цæстæнгас æм макуы уæд тызмæг, –
Рæстаг тæрхон æгас дунейы нал ис.

О Стыр Хуыцау, цы стæм Дæ разы – рыг.
Нæ лæппуты нын ма сафæнт ызнæгтæ.
Ды барон дæ, æхцон Дын нæу нæ хъыг,
Уадз ма кæлой ныййарджыты цæссыгтæ.

Кæддæр нæ зæххыл тугуарæн уыдис, –
Нæ Иры дзыллæ фервæзти, нæ сыскъуыд.
Ныр сæфынц хæсты фæсивæд, фæдис!
О Сфæлдисæг, кæйдæр рæхыс та аскъуыд…

Кæмæндæр та йæ хæдзары бындур
Æвиппайды куы ныззылди, куы фехæлд…
О Стыр Хуыцау, Ды не знæгты фæсур!
Нæ Иры зæххыл туджы зæйтæ ракалд.

Æркæс-ма нæм, ныххатыр кæн, ныббар!
Уадз ма сæфой нæ фæсивæд æрвылаз.
Ды – не Скæнæг, нæ фæндæгтæ – Дæ бар,
Нæ адæмы нын раст фæндагыл сараз.

22.05.2024 аз

 

 УАРЗОНДЗИНАД

О Уарзондзинад, цал хуызы дын ис –
Æмбалы уарзт, ныййарæджы, хъæбулы…
Сæ диссагдæр – Хуыцауы уарзт, мæ ис,
Уый се ‘ппæты дæр алцæмæй æмбулы.

О Уарзондзинад, цас хъару дæм ис!
Æхсыры цадау ленк кæнын дæ фурды.
Рыст зæрдæйæн ды фесафыс йæ рис,
Дæ уылæнтæй ысфæлдахыс къæйдуртæ.

О Уарзондзинад, цас бæркад дæм ис!
Дæ бирæ хæрзтæй дзаг дæн æз æфсирау.
Дæ урс æхсырæй нал зонын æфсис,
Мæ удрæбыны сæрттивыс сапфирау.

20.05.2024 аз

 

 МÆ ФЫДЫ ЦÆСТЫТÆ

Мæ фыды цæстытæ мæм къамæй кæсынц,
Йæ цæсгомы ‘нцъылдтæ уым арфдæр зынынц.
Æгас ма куы уыди, – нæ сæ уыдтон æз,
Уæд цардæн æххæстæй нæ зыдтон йæ уæз.

Мысинæгтæ, къамтæ… кæм ма йæ уынын?
Мæ фыд мын æмбæрста мæ сагъæс, мæ зын.
Уыдтæн æз æххуысхъуаг, уæззау уыд мæ уаргъ, –
Мæ фыд мæм ссыди… о, уымæн нæй аргъ.

Фæлмæн дзырдтæ дзураг нæ уыдис мæ фыд,
Уæддæр ын æмбæрстон йæ сусæг рæвдыд.
Йæ арфæ, йæ уарзтæй нæ уыдтæн æз цух,
Йæ зæрдæ ис мемæ мæ царды æдзух.

20.05.2024 аз

 

 ИРОН ÆВЗАГ

Ирон æвзаг мæ хæзна у, мæ фат,
Уый фидиуæгау атæхы мæ разæй.
Фыдæлты ‘взагæн чи нæ кæны кад,
Уый сидзæрау æнæ хай у йæ тавсæй.

Мæ райдзаст хур – алайнæгты æвзаг –
Мæ адæмæн, мæ бæстæйæн æрттивы.
Дзырды хъомысæй фестъæлфы ызнаг,
Ныхасы фарнæй царды фæндаг ивы.

23.04.2024 аз

 ИРОН ТЫРЫСА

Ирон тырыса сахары фæйлауы, –
Ирыстоны нæ бамынæг ÆХСАР.
Нæ адæмы нын раст зондыл æфтауы, –
Фыдлæг нæ бæстæн макуы суæд æлдар.

Фыдыбыстæмæ, Иры зæхмæ сидынц
САБЫРДЗИНАД, РÆСТДЗИНАД æмæ ФАРН.
Нæ тырыса – Ирыстонæн йæ фидыц,
Йæ фæзынд уыд нæ адæмæн лæвар.

Йæ тырыса кæм æрсадзы ирон лæг,
Хæххон цæргæсау уыцы ран – хæдбар.
Нæ тырыса – нæ цæугæ хох, нæ айнæг,
Нæ йыл цæуы тыхгæнæгæн йæ бар.

Нæ тырыса – СЫГЪДÆГДЗИНАДЫ символ,
Ирон лæгæн – йæ НАМЫС æмæ КАД.
Йæ сæраппонд нæ ауæрды йæ цардыл, –
Нæ фыдыбæстæ макуы уæд хъыгдард.

Нæ тырыса куы разына Хъæриуæй,
Йæ цъуппыл дæр – рæсугъд æмæ æдас.
Ирон лæппу йæ хъахъхъæны йæ риуæй,
Бæсты сæрвæлтау ферох кæны тас.

27.05.2004 аз