Тынг арæх кæм Интернеты, кæм нæ республикæйы равдыстыты залты æвдыст æрцæуынц нывгæнæг-символист Еленæ Кизиловайы нывтæ. Аивадуарзджытæн зонгæ у йе сфæлдыстадон псевдоним Свати Фарнæ-йæ (SwatiFarnæ).

Мæнмæ афтæ кæсы, цыма дуне иу егъау ныв у, кæцыйы уыцы иу рæстæг баиу сты царды хуымæтæгдзинад æмæ йæ зынтæ, ис дзы уæларвон фарн æмæ æцæгдзинады уысмтæ, уарзт æмæ гармони.

Еленæ ныв кæны кæттагыл, ис æм графикон куыстытæ дæр. Уыимæ дæсны у дизайнерон куыстытæм дæр. Сæ фылдæр сты национ темæтыл. Нарты кадджыты хъайтартæ, кадæггæнджытæ, таурæгътæ, аргъæуттæ, æмбисæндтæ, фыдæлты символикон нысантæ, геральдикæ… ацы мотивтæ райгуырдысты авторы æгæрон уарзондзинадæй æмæ ссардтой сæхи сæрмагонд бынат аивадуарзджыты зæрдæты, стыр аргъ сын кæнынц аивадиртасджытæ дæр. Зынгæ æнтыстытæ равдыста натюрморт æмæ пейзажы жанрты, чысыл скульптурæйы. 2019 азы фæзынд авторы аивадæй фæлыст уæлæдарæс. Каст фæцис Дзæуджыхъæуы Дзанайты Азанбеджы номыл нывкæнынады училище. Йæ ахуыргæнджытæ уыдысты Бедойты Шалва, Челæхсаты Магрез, Басаты Олег, Цъæхилты Эльбрус. Уымæй размæ та каст фæцис Дзæуджыхъæуы Тауаситы Сослæнбеджы номыл сывæллæтты нывкæнынады скъола. 1999 азæй у УФ-йы Дизайнерты цæдисы уæнг.

Йæ нывты фыццаг сæрмагонд равдыст арæзт æрцыд 1997 азы. Уæдæй абонмæ уыдон свæййынц, нæ республикæйы æмæ æндæр горæтты цы равдыстыты фæархайы, уыдоны фидыц. Бирæты фæфæнды Еленæйы нывтæй саив кæнын йæ цæрæн бынат кæнæ йæ куыстуат. Цы ма уа лæварæн хуыздæр!

Йæ фыдæлты зæххы традицитæм йе ‘ргом цы нывгæнæг здахы, стыр аргъ сын чи кæны æмæ сæ цæсты гагуыйау чи хъахъхъæны, уый кæддæриддæр йемыдзаг уыдзæн æнæбайсысгæ удцырын, уæлкурдиатæй. Архайын, цæмæй мæ нывты æвдыст цæуой Ирыстон-Аланийы историон æцæгдзинады сойтæ, мæ адæмы уидæгты сакралондзинад æмæ нын сæ фæстæ цы æнæивзигæ хъæздыгдзинæдтæ ныууагътой, уыдон – нысантæ æмæ символтæ, фæсномыг сурæттæ æмæ таурæгъон хъæбатырты фæлгонцтæ.

Абон Еленæ у, царды цы фæндаг равзæрста, ууыл фидар æмæ ныфсджын къахдзæфтæй размæ чи цæуы, уыцы курдиатджын æмæ фæлтæрдджын нывгæнæг. Уыимæ ныфсхаст сылгоймаг, уд æмæ зондæй йæ фыдæлты уидæгтимæ баст чи у, ахæм нывгæнæг-философ.

Йæ къустытæм кæсут нæ фотогалерейы 

УАНИОН