ÆНÆ БÆЛЛИЦ НÆЙ ДУНЕЙЫ ЦÆРÆН

 ФЫДÆЛТЫ ЗДЖЫД

Фыдæлты Зджыд, мæ хорз мыггаджы авдæн,
Куыд фæлмæн у дæ дурарæх хъæбыс!
Нæ табуйаг Сырх Алардыйы бадæн,
Мæнæн дæ тавс æвдадзы хос у, ныфс!

Рæвдауы уд Сырычы доны сатæг,
Йæ сыр-сыры – нæ ивгъуыды хъæлæс.
Фæхъуысы дзы зæронд Хъæвдыны кадæг,
Æмæ нæ зыны рагон хъæу æгæс.

Æрхуы Мæсыг ныр дæр ма рох нæ кæны,
Куыд ын тыдта йæ фидар къултæ знаг.
Фæлæ хъæддых лæууы æмæ нæ кæлы,
Нæ сахъ фыдæлты номимæ – æмуаг!

Æнусты дæргъы хæхты ‘хсæн æлхъывдæй,
Нæ фæци Зджыд фыдзаманты фæхъхъау –
Ам алы дур фæхайджын и нæ куывдæй,
Æмæ йыл уымæн ауды Хуыцау!

Цæрдзæни ма нæ рагфыдæлты къона,
Уындзæн ма мах йæ уæлдæфæй рæдау!
Уадз, фехъуса мæ алчи æмæ зона:
Æнæмæлгæ – йæ тых æмæ æгъдау!

Нæхи Ызджыд, мæ зарæг у дæ кадæн!
Кæны мæ хъарм дæ дурарæх хъæбыс!
Нæ табуйаг Сырх Алардыйы бадæн,
Мæнæн дæ тавс æвдадзы хос у, ныфс!

5.04.2024 аз

  НЫХАС ЗÆРДÆИМÆ

Цæмæн у риуы зæрдæйæн къуындæг?
Фыды чысыл мур йеддæмæ куы нæу!..
Дæхи ма ма хой афтæ ды цæрдæг,

Æрæнцай, зæрдæ, багъæц-ма, фæлæуу!..
Уæвгæ, зын у… мæ зонд дæр æй кæрды…
Ыссынц куыройау дуджы фыдтæ мах,

Æмæ хæфау нæ судзгæ маст гæрды
Æддæмæ. Царды рухсдæттæг цырагъ
Кæны тыхсыгъд, йæ цæхæр у мынæг…

Фæлæ мын разын, о зæрдæ, быхсон,
Цæмæй мæныл фыддуг æмæ фыдлæг
Æнæ тæригъæд ма ‘взарой сæ бон!

Нæ зæххон цард у иудадзыг дæр тох,
Йæ быдыртæ – нæ бæллицты гуырæн!
Æнæ бæллиц та, ма-иу дæ уæд рох,
Æппындæр нæй нæ дунейы цæрæн!

17.08.2023 аз

 

 РОХ ХЪÆУБÆСТÆ

Зыбыты рох… Æнус дзы нæй цæрæг, –
Хæххон хъæубæстæ уазал мигъы тайы…
Æмырæй ма зæронд лæджы æндæрг
Йæ нарæг уынгтыл абон дæр æруайы.

Йæ цæстæнгас фыр æфхæрдæй – дæрзæг…
Æрбады лæг йæ хæдзары къæсæрмæ –
Уый хъахъхъæны йæ фыдæлты уæзæг…
Куыд æрхæсса йæ ныууадзын йæ сæрмæ?!

Рæхысы цæгтæ ацахуырста згæ –
Фæцух и къона Сафайы хъæрмадæй…
Æрлæсы русыл цæстысыг хъуызгæ,
Куы рацæйзынынц ивгъуыд бонтæ дардæй…

Лæджы фидæн уæд фарнхæссæгау зынд,
Йæ цард фыхти пæлхъпæлхъгæнгæ хæхбæсты!..
Ныр та хуыст у цæджджинаджы бын зынг,
Æдых фæнык ма баззади йæ фæстæ…

Зыбыты рох… Æнус дзы нæй цæрæг, –
Нæ хъæубæстæ æгъатыр дуджы тайы…
Æрмæст фыдæлты рухс фарны æндæрг,
Йæ фенгæйæ, нæ цæстытыл фæуайы…

Май, 2022 аз

 ХУРЫ НЫХАС МÆЙМÆ

Хур дæн æз, ды та дæ мæй.
Не ‘хсæн арвы къуырф – уæрæх.
Цасфæнды мæ фæстæ тæх –
Махæн иумæ ‘рлæууæн нæй!

Мах кæрæдзийæ стæм дард,
Афтæ сныв кодта хъысмæт.
Иумæ фембæлыны мæт
Никуы банкъардзæн нæ цард.

Ды кæм дæ, уым нал дæн æз,
Уый дын н‘ адзалы бæллæх…
Ис нын иумæйагæй Зæхх,
Уымæн рухс хæссын – нæ хæс!

14.11.2021 аз

 

ЗЫМÆГОН БОН ХЪÆРИУЫ ХОХЫ РАЗ

Зымæгон хурмæ ‘взист цæхæртæ калгæ,
Баргъæвст дыууæ комы астæу Хъæриу.
Йæ митсæрæй цъæх арвы къуырфмæ ‘вналгæ,
Тавы æнкъардæй уый йе ‘дзæрæг риу.

Æнусон хох – фыдызæххы хъалагъур –
Дардмæ кæдæмдæр æдзæмæй нымдзаст…
Кæсы, цыма нæ Ирбæстæм тыхагур
Бабырсын исчи ысфæнд кодта раст.

Æнæфæцудгæ мидбынаты хиты
Арв æмæ зæххы ‘хсæн уаз зæдты хид…
Йæ сагъæстæ Æрыдонимæ ‘рвиты, –
Уый йæ йæ уаргъæй кæд феуæгъд кæнид…

Нæрæмон дон ын йе ‘рхæндæг ыскъæфы,
Абухын февналы сонтæй. Æниу,
Æнкъард уæддæр нæ комы стъæлфын…
Риссы йæ хъæдгæмттæй рагон Хъæриу.

Лæууын йæ раз, æгуыппæгадмæ хъусæг –
Доны уынæр ма æрцахсын æрмæст.
Бæргæ йын æз куы базонин йæ сусæг, –
Айнæг хох афтæ цæмæй у фæлмæст…

Йæ дурджын арфы, чи зоны, æмбæхсы
Махæй фыдрæстæджы ‘нæзонгæ маст,
Æмыр куывдæй нæ дауджытыл фæдзæхсы,
Иры хъæбултæм ыздахы сæ каст.

10.04.2024 аз

 БИРÆ

Æдзухдæр, раст цыма у бирæгъ,
Фæкæны адæймаг хæлæф.
Йæ зæрдæ бацагуры бирæ,
Фырзыд вæййы æмæ кæрæф.

Дæ мулк куыд нæ фæуа дæ фарсæй,
Лæбурын алцæмæ ныууадз,
Кæннод æфтиагæн йæ асæй
Дзæвгар фæфылдæр вæййы хардз.

Фæриссы бирæ куыстæй астæу,
Нæ кæны ‘хцаджын лæг фынæй…
Æрмæстдæр царды бирæ уарзтæй
Зиан æппын æрхæссæн нæй!

11.04.2024 аз

 АМОНДДЖЫН ДИДИНÆГ

Дурты ‘хсæнæй хохы фахсыл
Дидин арвы цъæхмæ скаст.
Уый сызгъæрин тынтæ ахсы,
Уый фыдæх нæ зоны, маст.

Хохы амондджын – йæ бынат,
Хурæй райгонд у, рæвдыд.
Нæй йæм бафсæрыны фадат,
Ам рæстæг нæ зоны цыд.

Рæзы дидинæг æвыдæй,
Никуы базыдта æфхæрд –
Адæймагмæ царæфтыдæй
Не ‘рцыд хæдзары æвæрд!

14.04.2024 аз